有選擇困難症的朋友去幫襯新張的聰記車仔麵，一定好頭痕！因為實在太多選擇，單是麵底就有十三款、湯底又有七款，餸料甚至超過五十款。最低消費兩餸一麵都係$30，鮑汁花膠做餸都係$33！價錢平民化，難怪贏盡街坊掌聲。
聰記車仔麵老闆謝展聰一向從事飲食業，有感車仔麵極富香港特色，而且多空間發揮，例如餸料，蘿蔔、豬皮、芝士腸固然齊備，店內還有多款坊間少見的誠意之作，推介大家一試芫荽韮菜花餃，帶爽脆口感，清香味道亦相當出眾。嗜辣的話必試招牌辣肉碎及雲南腩肉，前者以半肥瘦豬肉炒製，精髓是加了香港少有的雲南醬同炒，香辣刺激。
另一賣點是鮑汁花膠，老闆透過朋友，以超值價買到花膠，他亦藉此機會益街坊，跟車仔麵點選，鮑汁花膠每份$12咋！滑溜彈牙，非常受女士歡迎。滷水餸料亦精彩，聰記的滷水汁，加了可樂提升鮮味，滷水膽又會每天加入新材料熬煮，味道更富層次，所以滷出來的金錢肚、大腸、雞翼、雞腎等，都帶醇醇的滷水陳香。
至於湯底，是熬了十多小時的鮮濃高湯膽，配上麻辣汁、腩汁、滷水汁、咖喱汁、沙嗲汁，即成惹味湯底。大家亦可選清湯或番茄湯，適合配不同餸料。別忘了吃麵時，加入自家炒製的菜脯，鹹香爽脆，愈食愈開胃。即日起至7月31日，凡惠顧全單九折，消費滿$50可獲贈招牌菜脯一樽。
聰記車仔麵
地址: 旺角廣華街2-20號翠園大樓二期地下8號舖
你或有興趣的文章：
